واصفِ ؒ باخبر

تیرا فرمایا مولیٰ کا فرمان ہے
واصفِؒ باخبر تیری کیا شان ہے
گفتگو تیری تفسیرِ قرآن ہے
مرشدِ باہُنر تیری کیا شان ہے

تیرے دَر پہ خرد جھک کے سجدہ کرے
تو بھی شانِ سلونی کا سلطان ہے
واصفِؒ باخبر تیری کیا شان ہے
تیرے دَر سے حقیقت کا عرفاں ملے
تیرے دم سے کنول آگہی کا کھلے
بات تیری حقیقت کی پہچان ہے
واصفِؒ باخبر تیری کیا شان ہے

تیری پہچان ہے ماورائے گماں
فکر تیری ہے افکار کا آسماں
تو سخن کا شہنشاہ و سلطان ہے
واصفِؒ باخبر تیری کیا شان ہے

راز تیرے کو ہم جیسے پائیں کہاں
تیری صورت ہوا کنزِ مخفی عیاں
تجھ سے وابستگی میرا ایمان ہے
واصفِؒ باخبر تیری کیا شان ہے

فقر تیرا بھی ہے فخرِ صلّ علیٰ
تو بھی ہے مشعلِ راہِ نورِ ھدیٰ
مظہرِ مرتضیٰ ، تیری کیا شان ہے
واصفِؒ باخبر تیری کیا شان ہے
ہے سکوں ہی سکوں تیرے دربار میں
ہے عجب ہی نشہ تیرے دیدار میں
واصفی میکدہ جوئے عرفان ہے
واصفِؒ باخبر تیری کیا شان ہے

طائرِ لامکاں ، مُخبرِ کُن فکاں
موجِ قلزم عیاں ، اے فصیح البیاں
علَّمِہُ البیاں بھی تری شان ہے
واصفِؒ باخبر تیری کیا شان ہے
تجھ سے سیکھے کوئی نعت گوئی کا فن
دیکھی تجھ پہ ختم ‘ مصطفےٰ سے لگن
عشقِ احمد ہوا تیری پہچان ہے
واصفِؒ باخبر تیری کیا شان ہے

تیرا فرمان ہی میرا ایمان ہے
دین و دنیا میں تو میری پہچان ہے
تو ہی یوسف کا دلبر ہے جانان ہے
واصفِؒ باخبر تیری کیا شان ہے

محمد یو سف واصفی

4 Comments on "واصفِ ؒ باخبر"

  1. ANJUM IQBAL says:

    SubhanAllah.

  2. ZUBAIR HUSSAIN says:

    SUBHANLLAH, ALLAH HI ALLAH HAQ HI HAQ……………..

  3. ZUBAIR HUSSAIN says:

    SUBHANLLAH, BOOHAT KHUBSURAT , ALLAH HI ALLAH HAQ HI HAQ…………

  4. Muhammad Aslam Khan says:

    SUBHANLLAH.BHOT ALLA..ALLAH Hazrat Wasif Ali Wasif r.h KY DARJAT BULAND FRAMAEE.AAMEN

Got something to say? Go for it!