حضرت واصف علی واصف رح کے شعری مجموعے ”شب چراغ“ سے انتخاب
تو ایک قلزمِ رحمت وسیع و بے پایاں
میں ریگزارِ تمنا میں تشنہ باراں
تِرا جمال کہ ہے کائنات کی تنویر
میں اک مسافرِ شب‘ تیرگی میں سرگرداں
تو ایک راز کہ ظاہر بھی ہو تو پُر اسرار
میں تیرے راز کا محرم ‘میں تیرے فن کا نشاں
تو سامنے ہو تو چھن جائے تابِ نظارہ
میں آئینے میں ہوں گم‘ مثلِ دیدئہ حیراں
تو لامکاں کا مکیں اپنی ذات میں تنہا
مری شریکِ سفر کیوں ہو گردشِ دوراں
تو وہ کہ نور سے تیرے ضیائے ارض و سمائ
میں تِیرہ شب‘ میں تمنائے روزنِ زنداں
تو خود قریبِ رگِ جاں رہے تو بات الگ
میں دوری¿ شبِ ہجراں میں شورشِ گریاں
تُو ایک برقِ تجلی کہ ہر وجود میں تُو
میں ایک سنگ کہ اپنے وجود میں لرزاں
تو وہ قدیم کہ آغاز ہے نہ ہے انجام
میں وہ کہ حادث و فانی و بے خبر انساں
تو ہر خیال کی رفعت سے ارفع و اعلیٰ
میں لاﺅں کون سے الفاظ‘ شان کے شایاں
تو آ سکے تو مرے غم کی کائنات میں آ
میں آ گیا تیری چاہت میں اب کہاں سے کہاں
عجب نہیں تو مرے غم کدے میں آ جائے
عجب نہیں کہ مرے درد کو ملے درماں
بجا کہ لطف و کرم بے کنار ہے تیرا
بجا کہ مجھ کو ہے احساسِ تنگی داماں
نگاہِ فکر سے پردے اٹھا مرے مولا
سرِ فلک بھی دھواں ہے‘ سرِ نظر بھی دھواں
تجھے ہے واسطہ تیری بقائے مطلق کا
مرے وطن کی بقا کا بھی کچھ تو ہو ساماں
تو ہی بتا کہ تجھے کیا کہے ترا واصف
ملے زبان کو دل ‘ یا عطا ہو دل کو زباں
